तास खेलिरहेको ठाउँमा प्रहरी पुगेपछि भागाभाग, पक्राउ परेका एक जनाको मृत्यु

१३ असोज, विराटनगर । तास खेलिरहेको स्थानमा प्रहरी पुगेपछि भएको भागाभागका क्रममा पक्राउ परेका एक जनाको मृत्यु भएको छ । घटनामा एक जना घाइते भएका छन् ।

सोमबार राति करिब साढे ११ बजे विराटनगर महानगरपालिका–६ सरोचियास्थित लालु पासवानको घरमा तास खेलिरहेको अवस्थामा प्रहरीको गस्ती टोली पुगेपछि भागाभाग भएको थियो ।

सोही क्रममा पक्राउ परेका विराटनगर महानगरपालिका–१४ का ५५ वर्षीय बलराम कोइरालाको मंगलबार बिहान मृत्यु भएको हो । त्यस्तै, भाग्ने क्रममा दुई तलाबाट हामफालेका विराटनगर–८ का ४१ वर्षीय चन्दन मुखियाको दाहिने खुट्टा भाँचिएको छ । उनको श्री अस्पतालमा उपचार भइरहेको प्रहरीले जनाएको छ ।

जिल्ला प्रहरी कार्यालय मोरङका प्रवक्ता डीएसपी मकेन्द्रकुमार मिश्रका अनुसार प्रहरीले उक्त स्थानबाट ८ जनालाई पक्राउ गरेको थियो । प्रहरी पुग्दा भागाभाग हुँदा कोइराला सामान्य घाइते भएका थिए ।

पक्राउपछि स्वास्थ्य जाँच गर्दा अवस्था सामान्य देखिएपछि कोइरालासहित सात जनालाई सोमबार राति हिरासतमा ल्याइएको मिश्रले जानकारी दिए । घाइते मुखियाको भने अस्पतालमा उपचार भइरहेको छ ।

हिरासतमा रहेका कोइराला मंगलबार बिहान करिब साढे ७ बजे अचेत अवस्थामा भेटिएका थिए । पक्राउ परेका अन्य व्यक्तिले उठाउन खोज्दा नउठेपछि प्रहरीले उनलाई उपचारका लागि कोशी अस्पताल पठाएको थियो ।

कोशी अस्पतालमा उपचार हुन नसकेपछि उनलाई नोबेल शिक्षण अस्पतालमा भर्ना गरिएको थियो । नोबेल शिक्षण अस्पतालका चिकित्सकले मंगलबार करिब ११ बजे उनलाई मृत घोषणा गरेका हुन् ।

मोरङ प्रहरीका सूचना अधिकारी डीएसपी मिश्रका अनुसार कोइरालाको शव नोबेल अस्पतालमै रहेको छ । प्रहरीका अनुसार कोइरालाको यसअघि टाउकाको शल्यक्रिया भएको थियो । उनको मृत्युको कारण भने तत्काल खुल्न बाँकी रहेको प्रहरीले जनाएको छ ।

प्रहरीका अनुसार घटनाका क्रममा विराटनगर–८ का ४१ वर्षीय चन्दन मुखियाले दुई तलामाथिबाट हामफालेका थिए । एम्बुलेन्स चालकसमेत रहेका मुखियाको दाहिने खुट्टा भाँचिएको प्रहरीले जनाएको छ ।

प्रहरीले पासवानको घरबाट मृतक कोइराला र घाइते मुखियासहित मोरङको धनपालथान गाउँपालिका–६ का ३३ वर्षीय साजन राजवंशी, विराटनगर–४ का ५२ वर्षीय सत्यनारायण राजवंशी, ४८ वर्षीय तोरण यादव, विराटनगर–६ का २६ वर्षीय राजेश कामत, ५३ वर्षीय गंगाराम मण्डल र ४३ वर्षीय विष्णु कामतलाई पक्राउ गरेको जनाएको छ ।

उनीहरूको साथबाट ४८ हजार ३९५ रुपैयाँ नगद बरामद भएको प्रहरीले जनाएको छ ।