बाटो खुले पनि तरकारीको भाउ घटेन, केहीमा १५० प्रतिशतसम्म वृद्धि

काठमाडौं । अविरल वर्षा र बाढीका कारण पृथ्वी राजमार्ग अवरुद्ध हुँदा प्रभावित भएको तरकारी तथा दैनिक उपभोग्य वस्तुको आपूर्ति सहज भए पनि काठमाडौंको बजारमा तरकारीको मूल्यमा अपेक्षित कमी आएको छैन ।

गत भदौ १० र १४ गतेको वर्षा तथा बाढीका कारण धादिङको कृष्णभीरलगायतका स्थानमा त्रिशूली नदीले सडक कटान गरेपछि पृथ्वी राजमार्ग अवरुद्ध भएको थियो । सडक बन्द हुँदा काठमाडौं उपत्यकामा तरकारी तथा अन्य दैनिक उपभोग्य वस्तुको आपूर्ति प्रभावित भएको थियो ।

तर, सडक खुलेर यातायात तथा ढुवानी सहज भइसकेपछि पनि केही तरकारीको मूल्य झन् बढेको कालीमाटी फलफूल तथा तरकारी बजार विकास समितिको तथ्यांकले देखाएको छ ।

समितिले सार्वजनिक गरेको भदौ १६ गते र असोज ६ गतेको मूल्य विवरण तुलना गर्दा ब्रोकाउलीको मूल्य १५० प्रतिशतसम्म बढेको देखिन्छ । भदौ १६ गते प्रतिकेजी १३० रुपैयाँ रहेको ब्रोकाउलीको मूल्य असोज ६ गते ३२५ रुपैयाँ पुगेको छ ।

त्यस्तै, घिरौँलाको मूल्य १६.२५ रुपैयाँबाट बढेर ३५ रुपैयाँ पुगेको छ । लाम्चो भन्टाको मूल्य पनि १६.८८ रुपैयाँबाट बढेर ३५ रुपैयाँ पुगेको छ ।

रायोको सागदेखि भिण्डीसम्म महँगियो

दैनिक भान्सामा बढी प्रयोग हुने सागपात तथा तरकारीको मूल्यसमेत उल्लेख्य बढेको छ ।

भदौ १६ गते प्रतिकेजी ५१.४३ रुपैयाँ रहेको रायोको सागको मूल्य असोज ६ गते १०० रुपैयाँ पुगेको छ । यसैगरी सेतो मूला (हाइब्रिड) को मूल्य ८८.५५ प्रतिशत, तितो करेला ६२.५० प्रतिशत र भिण्डी तथा हरियो लसुनको मूल्य ५७.१४ प्रतिशतले बढेको तथ्यांकमा उल्लेख छ ।

ठूलो गोलभेडा (नेपाली) को मूल्य भने १३.३३ प्रतिशतले घटेर प्रतिकेजी ६५ रुपैयाँमा झरेको छ । तर, साना गोलभेडा (लोकल, टनेल र भारतीय) को मूल्य १९ देखि ३८ प्रतिशतसम्म बढेको छ ।

केही तरकारीको मूल्य भने घट्यो

सडक तथा ढुवानी सहज भएपछि सबै तरकारीको मूल्य बढेको भने छैन । केही कृषि उपजको मूल्य उल्लेख्य घटेको कालीमाटी बजारको तथ्यांकले देखाएको छ ।

भदौ १६ गते प्रतिकेजी ४५० रुपैयाँ रहेको जिरीको सागको मूल्य ७२ प्रतिशतले घटेर १२५ रुपैयाँमा झरेको छ । त्यस्तै, रुख टमाटरको मूल्य २७५ रुपैयाँबाट घटेर १२५ रुपैयाँ पुगेको छ ।

अमलाको मूल्य १७५ रुपैयाँबाट घटेर ९० रुपैयाँ, चुकुन्दरको मूल्य १२० रुपैयाँबाट घटेर ६५ रुपैयाँ तथा सेलरीको मूल्य ४५० रुपैयाँबाट घटेर ३०० रुपैयाँमा आएको छ ।

केरा (नेपाली) को मूल्य ३६.३६ प्रतिशत र मालभोग केराको मूल्य ३४.२१ प्रतिशतले घटेको छ ।

केही वस्तुको मूल्य स्थिर

कालीमाटी बजारको तथ्यांकअनुसार केही कृषि तथा खाद्य वस्तुको मूल्य भने भदौ १६ देखि असोज ६ गतेसम्म परिवर्तन भएको छैन ।

ताजा माछामध्ये रहु प्रतिकेजी ३४४ रुपैयाँ, बचुवा ३२० रुपैयाँ र छडी ३३५ रुपैयाँ तथा सुकेको माछा ९०० रुपैयाँमा स्थिर रहेको छ ।

त्यस्तै, हरियो फर्सी (डल्लो), पिँडालु, हरियो प्याज, न्यूरो, सजिउन, रातो बन्दा, पुदीना, तामा, तोफु, गुन्द्रुक, जुनार, किवि, नरिवल र सुकेको खुर्सानीको मूल्यमा पनि उक्त अवधिमा परिवर्तन नभएको तथ्यांकले देखाएको छ ।

उपभोक्ता अधिकारकर्मीहरूले भने सडक तथा ढुवानी सहज भइसकेपछि पनि स्थानीय रूपमा उत्पादन हुने सागपात तथा हरियो तरकारीको मूल्य बढ्नुको कारणबारे बजार अनुगमन र अध्ययन आवश्यक रहेको बताएका छन्।