मध्यराति दुई वर्षीय बालक लिएर भाग्न खोजेको आरोपमा भारतीय महिला स्थानीयको नियन्त्रणमा

१९ असोज, कपिलवस्तु । कपिलवस्तुको यशोधरा गाउँपालिका–८ मधुनगरा गाउँमा मध्यराति दुई वर्षीय बालकलाई लिएर भाग्न खोजेको आरोपमा एक भारतीय महिला स्थानीयवासीको नियन्त्रणमा परेकी छन् ।

स्थानीयका अनुसार विनोद पासीका दुई वर्षीय नाति आनन्द पासीलाई आइतबार राति करिब २ बजे खाटमा सुतिरहेको अवस्थामा ती महिलाले लिएर भाग्न खोजेकी थिइन् ।

बालक लिएर भाग्दै गरेको अवस्थामा स्थानीयवासीले महिलालाई नियन्त्रणमा लिएका थिए । स्थानीयले उनलाई रातभर पोलमा बाँधेर राखेको र बिहान प्रहरीलाई खबर गरी जिम्मा लगाएको बताएका छन् ।

स्थानीयका अनुसार ती महिलाले आफू भारतको झारखण्ड निवासी भएको बताएकी छन् । उनको साथबाट ब्लेड र रस्सीसमेत बरामद भएको स्थानीयले दाबी गरेका छन् ।

तर, ती महिला बालक चोरीकै उद्देश्यले आएको हो वा घटनाको वास्तविकता के हो भन्नेबारे प्रहरीले अनुसन्धान गरेपछि मात्रै स्पष्ट हुने बताइएको छ ।

जिल्ला प्रहरी कार्यालय कपिलवस्तुका सूचना अधिकारी रिपेन्द्रकुमार सिंहले स्थानीयले दिएको सूचनाका आधारमा महिलालाई प्रहरी कार्यालयमा ल्याउन लागिएको बताएका छन् । प्रहरी कार्यालयमा ल्याएपछि घटनाबारे थप अनुसन्धान तथा सोधपुछ गरिने उनले बताए ।

घटनाबारे प्रहरीले अनुसन्धान थालेपछि मात्रै महिलामाथि लागेको आरोपको वास्तविकता स्पष्ट हुने प्रहरीले जनाएको छ ।