१५ असोज, काठमाडौं । प्रतिनिधिसभाको बैठकमा सांसदहरूले किसानले भोगिरहेको रासायनिक मलको अभाव तथा सार्वजनिक भएको भनिएको अडियो प्रकरणबारे सरकारसँग जवाफ मागेका छन् ।

सांसदहरूले खेतीको महत्वपूर्ण समयमा समेत किसानले सहज रूपमा मल पाउन नसकेको भन्दै कृषि, वन तथा वातावरण मन्त्रालयको कार्यसम्पादनमाथि प्रश्न उठाएका हुन् । पछिल्लो समय संसदमा पनि मलको अभावलाई लिएर सांसदहरूले पटक–पटक सरकारको ध्यानाकर्षण गराउँदै आएका छन् ।

मलको आपूर्ति र वितरणमा देखिएको समस्याबारे कृषिमन्त्रीले संसदमा स्पष्ट जवाफ दिनुपर्ने सांसदहरूको माग छ । उनीहरूले किसानलाई समयमै मल उपलब्ध गराउने व्यवस्था गर्न तथा अभावको वास्तविक कारण सार्वजनिक गर्न सरकारसँग आग्रह गरेका छन् ।

यसैबीच कृषि क्षेत्रसँग जोडिएको अडियो प्रकरणबारे समेत सांसदहरूले चासो व्यक्त गरेका छन् । सार्वजनिक चर्चामा आएको उक्त अडियोको विषयमा वास्तविकता के हो भन्नेबारे कृषिमन्त्रीले संसदलाई जानकारी गराउनुपर्ने उनीहरूको माग छ ।

यसअघि पनि कृषिमन्त्री गीता चौधरीले धानबालीका लागि आवश्यक रासायनिक मलको व्यवस्था गरिएको र मल अभाव नहुने बताउँदै आएकी थिइन् ।

सांसदहरूले भने सरकारको दाबी र किसानले भोगिरहेको अवस्थाबीच फरक देखिएको भन्दै मल वितरणको प्रभावकारी व्यवस्थापन र अडियो प्रकरणबारे स्पष्ट जवाफ दिन माग गरेका छन् ।