विद्युतीय सार्वजनिक सवारीको भाडा समायोजन, बढी भाडा लिए ११११ मा उजुरी गर्न सकिने

असोज, काठमाडौं । सरकारले अन्तरप्रदेशमा सञ्चालन हुने विद्युतीय शक्तिबाट चल्ने सार्वजनिक सवारीसाधनको छोटो, मध्यम तथा लामो दूरीको भाडा दर समायोजन गरेको छ । यातायात व्यवस्था विभागले बिहीबार नयाँ भाडा दर सार्वजनिक गरेको हो ।

विभागका अनुसार तराई तथा पहाडी सडकमा सञ्चालन हुने यात्रुवाहक र मालवाहक सवारीसाधनको प्रतिकिलोमिटर भाडा दरमा परिमार्जन गरिएको छ ।

तराईको लामो दूरी अर्थात् २५० किलोमिटरभन्दा बढीको पक्की तथा ग्राभेल सडकमा सञ्चालन हुने यात्रुवाहक सवारीको भाडा प्रतिव्यक्ति प्रतिकिलोमिटर २ रुपैयाँ ९३ पैसा कायम गरिएको छ । त्यस्तै, २५ देखि २५० किलोमिटरसम्मको दूरीमा प्रतिव्यक्ति प्रतिकिलोमिटर ३ रुपैयाँ भाडा निर्धारण गरिएको विभागले जनाएको छ ।

यसैगरी, काठमाडौं–पोखरा र पोखरा–नारायणगढ सडक खण्डमा प्रतिव्यक्ति प्रतिकिलोमिटर ३ रुपैयाँ २४ पैसा भाडा कायम गरिएको छ ।

विभागका अनुसार डिलक्स सुविधा लिएको प्रमाणित भएका सवारीसाधनले तोकिएको सामान्य भाडा दरमा २० प्रतिशत थप रकम लिन सक्नेछन् । त्यस्तै, सुपर डिलक्स सुविधा लिएका सवारीसाधनले डिलक्सको भाडा दरमा थप २० प्रतिशत रकम जोडेर लिन पाउने व्यवस्था गरिएको छ ।

विद्यार्थी र ज्येष्ठ नागरिकलाई अनिवार्य छुट

विभागले सार्वजनिक गरेको आचारसंहिताअनुसार विद्यार्थी, अपाङ्गता भएका व्यक्ति तथा ज्येष्ठ नागरिकलाई तोकिएको दरमा अनिवार्य सहुलियत दिनुपर्नेछ ।

यस्तो सहुलियत दिँदा निश्चित रुट, कोटा वा दिन तोकेर सीमित गर्न नपाइने व्यवस्था गरिएको छ । सहुलियत प्राप्त गर्न यात्रुले आफ्नो सक्कल परिचयपत्र देखाउनुपर्नेछ ।

त्यसैगरी, लामो दूरीका रात्रिकालीन बसमा अनिवार्य रूपमा दुई जना चालक राख्नुपर्ने व्यवस्था गरिएको छ । चालक तथा सहचालकले परिचयपत्र वा तोकिएको पोसाक लगाउनुपर्ने विभागले जनाएको छ ।

तोकिएको भन्दा बढी भाडा लिने सवारीसाधनमाथि कडा कारबाही गरिने विभागले चेतावनी दिएको छ । बढी भाडा लिएको पाइएमा यात्रुले हेलो सरकारको टोल फ्री नम्बर ११११ वा ट्राफिक प्रहरीको नम्बर १०३ मा उजुरी गर्न सक्नेछन् ।

मालवाहक सवारीको भाडा पनि समायोजन

यात्रुवाहक सवारीसाधनसँगै मालवाहक ट्रकको भाडा दरसमेत समायोजन गरिएको छ । विभागका अनुसार तराई क्षेत्रमा मालवाहक सवारीको भाडा प्रतिकिलोमिटर प्रतिटन ७ रुपैयाँ ७२ पैसा र पहाडी क्षेत्रमा १४ रुपैयाँ ७७ पैसा कायम गरिएको छ ।

१० टन क्षमतालाई आधार मानेर विभागले विभिन्न रुटको भाडा दरसमेत निर्धारण गरेको छ ।

नयाँ दरअनुसार वीरगञ्ज–काठमाडौं पहाडी सडक खण्डमा ट्रकको भाडा ३१ हजार ४४६ रुपैयाँ र भैरहवा–काठमाडौं खण्डमा ३२ हजार १४१ रुपैयाँ तोकिएको छ ।

विभागले तोकेको भाडा दर तथा आचारसंहिता पालना गर्न यातायात व्यवसायीलाई आग्रह गरेको छ । यात्रुले पनि तोकिएकोभन्दा बढी भाडा नतिर्न र बढी भाडा लिएको अवस्थामा सम्बन्धित निकायमा उजुरी गर्न सक्नेछन्