२६ वैशाख काठमाडौं / भारतीय अधिकारीहरूले पाकिस्तानले भारत र भारतको कश्मीर क्षेत्रका सैनिक ठेगानाहरूमा मिसाइल र ड्रोन प्रहार गरेको बताएका छन् ।
तर पाकिस्तानले भने यसलाई अस्वीकार गर्दै भारतमाथि झुटो सूचना फैलाएको आरोप लगाएको सीएनएनले जनाएको छ ।
भारतको स्थानीय प्रहरी अधिकारीहरूका अनुसार पाकिस्तानको आक्रमणका कारण पञ्जाब, कश्मीर र राजस्थानका धेरै स्थानहरूमा ब्ल्याकआउट गरिएको छ । स्थानीय जनताहरूले डर र चिन्ता व्यक्त गरेका छन् ।
भारतीय सेनाका प्रवक्ताले सीएनएनलाई बताएअनुसार भारत–नियन्त्रित कश्मीरको जम्मू सहरमा विस्फोट सुनिएको र त्यस क्षेत्रमा ब्ल्याकआउट गरिएको छ । पत्रकार र स्थानीय जनताहरूले सहरमा आतंक र तनावको अवस्था देखिएको बताएका छन् ।
पञ्जाबको पठानकोटमा पनि प्रहरीले विस्फोटको रिपोर्ट प्राप्त गरेको बताएको छ । अधिकारीहरूले दुवै स्थानमा हवाई सुरक्षा प्रणाली सक्रिय गरिएको बताएको समाचारमा जनाइएको छ ।
पाकिस्तानको सूचना मन्त्रालयका अनुसार भारत–प्रशासित कश्मीरको वास्तविक सीमामा ४०–५० जना भारतीय सैनिक मारिएको दाबी गरेको छ । सीएनएनले यो दाबीको पुष्टि गर्न नसकेको र यसमा भारतीय रक्षा मन्त्रालयको प्रतिक्रिया मागेको छ ।
