घुस प्रकरणमा मुछिएका मन्त्री गुप्तालाई राजिनामा दिन एमाले स्थायी कमिटी सदस्य भट्टराईको सुझाव

३१ असार काठमाडौं / नेकपा एमालेका स्थायी कमिटी सदस्य राजन भट्टराईले घुस प्रकरणमा मुछिएका मन्त्री राजकुमार गुप्तालाई राजिनामा दिन सुझाव दिनुभएको छ ।
नेता भट्टराईले सामाजिक सञ्जाल मार्फत मन्त्री गुप्तालाई सुझाव दिंदै घुस प्रकरणको निरुपणका लागि आफू छानविनका लागि तयार रहेको छु भन्दा नै पार्टी,सरकार र स्वयं गुप्तालाई पनि फाइदा हुने भट्टराईले उल्लेख गर्नुभएको छ ।

स्थायी कमिटी सदस्य भट्टराईले लेख्नु भएको छ– संघीय मामिला मन्त्रीज्यूले पदमुक्त भएर छानविनका लागि आफु तयार रहेको छु भन्दा नै सरकार,पार्टी र उहाँ स्वयंलाई हित हुने देखिन्छ ।

कास्की मालपोतका तत्कालीन प्रमुखको सरुवा थमौती र भूमि समस्या समाधान आयोग कास्कीका जिल्ला अध्यक्ष नियुक्ति गरिदिन भन्दै मन्त्री गुप्ताले विभिन्न व्यक्तिसँग ७८ लाख घुस मागेको अडियो केही दिन पहिले सार्वजनिक भएको थियो ।