बेपत्ताको आशा मर्दै, काँस–कुशको शव बनाएर सामूहिक अन्त्येष्टि

काठमाडौं, भदौ १७ । रसुवाको भोटेकोशी क्षेत्रमा आएको विनाशकारी बाढीपछि बेपत्ता भएका आफन्तको खोजी लामो समयसम्म पनि निष्कर्षमा नपुगेपछि परिवारजनले अन्ततः काँस–कुशबाट शवको प्रतीकात्मक प्रतिमा बनाएर सामूहिक अन्त्येष्टि गर्न थालेका छन्।

बुधबार काठमाडौंको पशुपति आर्यघाटमा दर्जनौं काँस–कुशबाट बनाइएका प्रतीकात्मक शवहरूको हिन्दू परम्पराअनुसार सामूहिक अन्त्येष्टि गरिएको हो। बाढीमा बेपत्ता भएका आफन्तहरूको कुनै अत्तोपत्तो नलागेपछि बाध्य भएर परिवारजनले धार्मिक संस्कार पूरा गर्न यस्तो निर्णय लिएको बताएका छन्।

आर्यघाटमा बिहानैदेखि बेपत्ता व्यक्तिका परिवारजन, आफन्त तथा शुभेच्छुकहरूको बाक्लो उपस्थिति देखिएको थियो। काँस–कुशबाट बनाइएका प्रतिमालाई शवसरह मानेर अन्त्येष्टि गरिँदा आफन्तहरूको रुवाबासीले वातावरण अत्यन्त भावुक बनेको थियो।

बेपत्ता आफन्तको तस्बिर बोकेर आएका परिवारजनले अन्तिमपटक सम्झँदै श्रद्धाञ्जली अर्पण गरेका थिए। कतिपयले आशा मर्न नदिने प्रयास गरे पनि लामो समयसम्म खोजी गर्दा पनि कुनै जानकारी नआएपछि धार्मिक परम्परा अनुसार अन्त्येष्टि गर्नुपरेको बताएका छन्।

भोटेकोशी हुँदै त्रिशूली नदीमा आएको बाढीले रसुवा, नुवाकोट र धादिङ क्षेत्रमा ठूलो जनधनको क्षति पुर्‍याएको थियो। अझै पनि धेरै व्यक्ति बेपत्ता रहेको र खोज तथा उद्धार कार्य जारी रहेको सरकारी निकायहरूले जनाएका छन्।

यद्यपि आफन्तको कुनै खबर नपाउँदा पीडित परिवारहरू मानसिक रूपमा अत्यन्त विक्षिप्त अवस्थामा पुगेका छन्। त्यसैको पीडादायी दृश्य पशुपति आर्यघाटमा देखिएको थियो, जहाँ आशा र यथार्थबीच संघर्ष गरिरहेका परिवारजनले आँसुका साथ आफ्ना प्रियजनलाई अन्तिम बिदाइ दिएका छन्।