Post views: 8
११ असोज, काठमाडौं । अपराध अनुसन्धान कार्यालय टेकुका एसएसपी सन्तोष खड्काले पूर्वप्रधानन्यायाधीश चोलेन्द्र शम्शेर जबरालाई सुरक्षा थ्रेटपछि कार्यालयमा ल्याएर राखिएको बताएका छन् ।
एसएसपी खड्काका अनुसार जबरालाई सुरक्षा थ्रेट रहेको जानकारी पाएपछि राति नै महाराजगञ्जस्थित निवासबाट नियन्त्रणमा लिएर अपराध अनुसन्धान कार्यालय टेकुमा ल्याइएको हो ।
‘उहाँलाई सुरक्षा थ्रेट छ भन्ने थाहा पाएपछि राति नै केही हुनसक्छ भनेर हाम्रो कार्यालयमा ल्याएर राखेका हौं,’ एसएसपी खड्काले भने ।
गएराति अपराध अनुसन्धान कार्यालयको टोली जबरालाई नियन्त्रणमा लिन महाराजगञ्जस्थित निवास पुगेको थियो । प्रहरीले उनलाई नियन्त्रणमा लिएर टेकुस्थित कार्यालयमा ल्याएको हो ।
जबरालाई नियन्त्रणमा लिनुअघि प्रहरीले कुनै अदालतबाट पक्राउ पुर्जी नलिएको सम्बद्ध स्रोतले जनाएको छ ।
प्रहरी नियन्त्रणमा लिएपछि जबराले आफ्ना भाइ प्रभुशम्शेरलाई फोन गरेर आफूलाई प्रहरीले लिएर गएको जानकारी गराएका थिए ।
प्रभुशम्शेरले पनि प्रहरीहरूले ‘जेनजीबाट सुरक्षा थ्रेट छ’ भन्दै दाइलाई नियन्त्रणमा लिएर गएको बताएका छन् ।
प्रभुशम्शेरका अनुसार जबरालाई हाल अपराध अनुसन्धान कार्यालय टेकुमा राखिएको छ । उनी निकट स्रोतका अनुसार प्रहरीले जबरालाई कसैसँग भेट्नसमेत दिएको छैन ।
जबराका छोरा भने उनलाई भेट्नका लागि अपराध अनुसन्धान कार्यालय टेकु पुगेका छन् ।
