चोलेन्द्रलाई भेट्न मानव अधिकार आयोगको टोली टेकुमा

११ असोज, काठमाडौं । पूर्वप्रधानन्यायाधीश चोलेन्द्र शम्शेर जबरालाई भेट्न राष्ट्रिय मानव अधिकार आयोगको टोली अपराध अनुसन्धान कार्यालय टेकु पुगेको छ ।

प्रहरीले गएराति जबरालाई महाराजगञ्जस्थित निवासबाट नियन्त्रणमा लिएर अपराध अनुसन्धान कार्यालय टेकुमा राखेको छ । अपराध अनुसन्धान कार्यालयका एसएसपी सन्तोष खड्काले जबरालाई ‘सुरक्षा थ्रेट’ रहेको जानकारी पाएपछि कार्यालयमा ल्याइएको बताएका छन् ।

जबरालाई भेट्न पुगेको मानव अधिकार आयोगको टोलीलाई कार्यालयका सुरक्षाकर्मीले केही समय गेटमै रोकेको जनाइएको छ ।

जबरालाई नियन्त्रणमा लिनुअघि अदालतबाट पक्राउ पुर्जी लिइएको थियो वा थिएन भन्ने विषयमा समेत प्रश्न उठेको छ । सम्बन्धित स्रोतलाई उद्धृत गर्दै अनलाइनखबरले पक्राउका क्रममा अदालतबाट पक्राउ पुर्जी नलिइएको जनाएको छ ।

यसैबीच, पूर्वप्रधानन्यायाधीशजस्तो उच्च पदमा रहिसकेका व्यक्तिलाई प्रहरीले नियन्त्रणमा लिएको घटनाबारे विभिन्न प्रश्न उठिरहेका छन् । प्रहरीले भने उनको सुरक्षालाई कारण देखाउँदै टेकुस्थित कार्यालयमा राखिएको जनाएको छ ।

जबरामाथि कुन कसुरमा र कुन कानुनी आधारमा कारबाही प्रक्रिया अघि बढाइएको हो भन्नेबारे प्रहरीले विस्तृत जानकारी सार्वजनिक गरेको छैन । घटनाबारे थप विवरण आउन बाँकी छ ।