आपसी विश्वास फर्काउने अवसर बन्नुपर्छ कांग्रेस महाधिवेशन

काठमाडौं । नेपाली कांग्रेसको १५औँ महाधिवेशनलाई पार्टीभित्रको आपसी दूरी र असमझदारी बढाउनेभन्दा नमिलेका मन मिलाउने तथा विश्वास फर्काउने अवसरका रूपमा उपयोग गर्नुपर्ने धारणा सार्वजनिक भएको छ।
कांग्रेस सभापति गगनकुमार थापाले महाधिवेशनलाई पार्टीभित्रको आन्तरिक विवाद अन्त्य गर्दै आपसी सम्बन्ध सुधार र कांग्रेसलाई थप एकताबद्ध बनाउने अवसरका रूपमा लिनुपर्ने बताउनुभएको छ।
पार्टीभित्र पछिल्लो समय विभिन्न विषयमा मतभेद देखिए पनि महाधिवेशनले आपसी दूरी बढाउने नभई नमिलेका मन मिलाउने वातावरण बनाउनुपर्ने उहाँको भनाइ छ। उहाँले कांग्रेसलाई एउटा ठूलो परिवारसँग तुलना गर्दै परिवारका सदस्यबीच सधैँ एउटै मत नहुने भए पनि मतभिन्नतालाई व्यक्तिगत विवादका रूपमा लिन नहुने बताउनुभएको छ।
थापाले वडा अधिवेशनका क्रममा विगतका मतभेदलाई आधार बनाएर निर्णय नगर्न पार्टीका नेता तथा कार्यकर्तालाई आग्रह गर्नुभएको छ। फरक विचार र मत भए पनि पार्टीभित्र संवाद, सहमति र सहकार्यलाई प्राथमिकता दिनुपर्ने उहाँको धारणा छ।
यसैबीच, पार्टीभित्रको एकता कायम गर्न पूर्वसभापति शेरबहादुर देउवासहित असन्तुष्ट पक्षका नेताहरूलाई महाधिवेशनमा सहभागी गराउने प्रयास भइरहेको बताइएको छ। सभापति थापाले महाधिवेशन उद्घाटनको दिनसम्म सबै पक्षलाई सहभागी गराउने प्रयास गर्ने बताउनुभएको थियो।
थापाले पार्टीभित्रको एकता केवल नेताहरूबीचको सम्बन्धमा सीमित नराखी कांग्रेसबाट टाढिएका पुराना समर्थक तथा मतदातालाई समेत पुनः जोड्नुपर्ने बताउनुभएको छ। मतभिन्नता हुनु स्वाभाविक भए पनि त्यसलाई व्यक्तिगत विवाद नबनाई संवाद र सहमतिबाट समाधान खोज्नुपर्ने उहाँको भनाइ छ।
कांग्रेसको १५औँ महाधिवेशनलाई नेतृत्व चयन गर्ने प्रक्रियासँगै पार्टीभित्रको विश्वास, सहकार्य र एकताको वातावरण निर्माण गर्ने अवसरका रूपमा हेरिएको छ।