संसदीय विशेष समिति सभापतिमा गणेश पराजुलीको उम्मेदवारी

१३ असोज, काठमाडौं । हिमालमा जलवायु परिवर्तनको प्रभाव, जलवायु न्याय तथा भोटेकोशी–त्रिशूली विपद्सम्बन्धी संसदीय विशेष समितिको सभापतिमा राष्ट्रिय स्वतन्त्र पार्टी (रास्वपा) का सांसद गणेश पराजुलीलाई अघि सार्ने सहमति भएको छ ।

समितिको सभापति चयनका लागि असोज १४ गते बुधबार दिउँसो २ बजे निर्वाचन हुँदैछ । सभामुख डोलप्रसाद अर्यालले सोमबार बसेको प्रतिनिधिसभा बैठकमा सभापति निर्वाचनको मिति र समय तोकेका हुन् ।

भोटेकोशी–त्रिशूली क्षेत्रमा आएको बाढी तथा विपद्को अध्ययन गर्न प्रतिनिधिसभाले असोज ५ गते १५ सदस्यीय विशेष समिति गठन गरेको थियो । समितिको कार्यअवधि तीन महिना तोकिएको छ ।

समितिलाई हिमाली क्षेत्रमा जलवायु परिवर्तनको प्रभाव, भोटेकोशी–त्रिशूली विपद्को कारण तथा प्रभाव, खोज तथा उद्धार, राहत, पुनर्स्थापना, जोखिम न्यूनीकरणलगायत विषयमा अध्ययन गरी सुझाव दिने कार्यादेश दिइएको छ ।

समितिमा अच्युतम लामिछाने, अनुष्का श्रेष्ठ, गंगादेवी श्रेष्ठ, गणेश पराजुली, धनञ्जय रेग्मी, ध्रुवराज राई, निशा डाँगी, पुष्पराज कँडेल, मोहन आचार्य, मिङमाग्याबु शेर्पा, रमेशकुमार मल्ल, रविन्द्र पटेल, सरस्वती लामा, सुजाता तामाङ र सीता थपलिया सदस्य रहेका छन् ।

गणेश पराजुली सिन्धुपाल्चोक–१ बाट प्रतिनिधिसभा सदस्य निर्वाचित सांसद हुन् र रास्वपाका संसदीय दलका उपनेता समेत हुन् ।

सभापति चयनका लागि हुने निर्वाचनपछि समितिले आफ्नो काम अघि बढाउनेछ ।