बाढीले देशभरका झोलुङ्गे पुलमा क्षति, दोधारा–चाँदनीको पुलको पिल्लर भाँचियो

१४ असोज, काठमाडौं । पछिल्लो समय परेको अविरल वर्षा र बाढीका कारण देशका विभिन्न स्थानमा रहेका झोलुङ्गे पुलमा क्षति पुगेको छ । बाढी–पहिरोका कारण सडक सञ्जालसमेत अवरुद्ध हुँदा क्षतिको यकिन विवरण सङ्कलन गर्न कठिनाइ भइरहेको स्थानीय पूर्वाधार विकास विभागले जनाएको छ ।

विभागका उपमहानिर्देशक तथा प्रवक्ता कमलकुमार अधिकारीका अनुसार सुदूरपश्चिमको महाकाली नदी क्षेत्रदेखि गण्डकी प्रदेशको कालीगण्डकी करिडोरसम्मका विभिन्न झोलुङ्गे पुलमा क्षति पुगेको प्रारम्भिक जानकारी प्राप्त भएको छ ।

बाढी र पहिरोका कारण सडक अवरुद्ध हुँदा प्राविधिक टोलीलाई प्रभावित क्षेत्रमा स्थलगत रूपमा पुग्न समस्या भइरहेको उनले बताए । प्रदेशस्तरमा सीमित कार्यालय रहेका कारण पनि सबै क्षेत्रको विस्तृत विवरण तत्काल सङ्कलन गर्न चुनौती देखिएको अधिकारीको भनाइ छ ।

‘बाढीले बाटो बगाएका कारण हाम्रा प्राविधिक साथीहरूलाई प्रभावित स्थलमै पुग्न समस्या भइरहेको छ,’ प्रवक्ता अधिकारीले भने, ‘जिल्ला–जिल्लामा कार्यालय नहुँदा र प्रदेशस्तरमा एउटा मात्र कार्यालय रहँदा सबै क्षेत्रको यथार्थ विवरण तत्काल जुटाउन केही कठिनाइ भएको हो, विवरण सङ्कलनको काम भइरहेको छ ।’

दोधारा–चाँदनीको झोलुङ्गे पुलको पिल्लर भाँचियो

यसैबीच कञ्चनपुरमा दोधारा–चाँदनी नगरपालिका–४ र भीमदत्त नगरपालिका–१३ जोड्ने झोलुङ्गे पुलमा समेत बाढीका कारण क्षति पुगेको छ ।

करिब १ हजार ४ सय ५३ मिटर लामो उक्त झोलुङ्गे पुलका ८ वटा पिल्लरमध्ये पिल्लर नम्बर ३ भाँचिएको जनाइएको छ ।

पुलको दोधारा तर्फ करिब ५.६ मिटरको भाग माथि उठेपछि आवतजावतमा समस्या भएको छ । पिल्लरसमेत भाँचिएपछि पुलको संरचनामा क्षति पुगेर आवागमन अवरुद्ध भएको हो ।

महाकाली नदीमा आएको बाढीका कारण पुलको संरचनामा क्षति पुगेपछि स्थानीयवासीलाई आवतजावतमा समस्या भएको छ । क्षतिग्रस्त पुलको अवस्थाबारे प्राविधिक टोलीबाट थप अध्ययन तथा विवरण सङ्कलनको काम भइरहेको जनाइएको छ ।

देशका विभिन्न स्थानमा बाढी र पहिरोका कारण झोलुङ्गे पुलमा क्षति पुगेको प्रारम्भिक विवरण आएपछि स्थानीय पूर्वाधार विकास विभागले सम्बन्धित क्षेत्रबाट विवरण सङ्कलन गरिरहेको छ । सडक पहुँच सहज भएपछि प्रभावित क्षेत्रको स्थलगत निरीक्षण गरी क्षतिको विस्तृत विवरण तयार गरिने विभागले जनाएको छ ।