Post views: 50
१६ असोज, काठमाडौं । प्रहरीले काठमाडौंको चन्द्रागिरि नगरपालिका–२ स्थित नागढुङ्गा सुरुङमार्गको चेकपोस्टबाट भन्सार छलीको सामान बरामद गरेको छ ।
बिहीबार बिहान वीरगन्जबाट काठमाडौं आउँदै गरेको यात्रुवाहक बसबाट १५ बोरा घडी, ४ कार्टुन अमूल चिज, ३ कार्टुन अमूल क्रिम र १ कार्टुन मिल्किस्ट बिस्कुट बरामद गरिएको जिल्ला प्रहरी परिसर काठमाडौंका एसपी दानबहादुर थापाले जानकारी दिए ।
वीरगन्जबाट काठमाडौं आउँदै गरेको बा.प्र.०३–००१ ख ३४९३ नम्बरको यात्रुवाहक बसको डिक्कीमा बिलबिजकबिनाको सामान फेला परेको हो ।
प्रहरी प्रभाग नागढुङ्गाबाट खटिएको टोलीले बस रोकेर चेकजाँच गर्ने क्रममा डिक्कीमा लुकाएर राखिएको अवस्थामा उक्त सामान फेला पारेको प्रहरीले जनाएको छ ।
बरामद गरिएका घडी विभिन्न कम्पनीका रहेको प्रहरीले जनाएको छ । बिलबिजकबिना भेटिएका सबै सामान प्रहरीले नियन्त्रणमा लिएको छ ।
बरामद सामान आवश्यक कारबाहीका लागि त्रिभुवन अन्तर्राष्ट्रिय विमानस्थल भन्सार कार्यालय पठाइएको जिल्ला प्रहरी परिसर काठमाडौंले जनाएको छ ।
