गुल्मीमा पिकअप सडकबाट १०० मिटर तल खस्यो, तीन जना घाइते

गुल्मी । गुल्मीमा पिकअप गाडी दुर्घटना हुँदा तीन जना घाइते भएका छन्। बुटवलबाट बागलुङको बुर्तिबाङतर्फ जाँदै गरेको पिकअप गाडी आज बिहान दुर्घटनामा परेको हो।
रुद्रवेणी–वामीटक्सार सडकखण्डअन्तर्गत मुसिकोट नगरपालिका–५, झक्कलेमा लु १ च ८०२४ नम्बरको पिकअप गाडी अनियन्त्रित भई सडकबाट करिब १०० मिटर तल खसेको प्रहरीले जनाएको छ।
बागलुङ जिल्लाको निसीखोला गाउँपालिका–५ निवासी ३९ वर्षीय मदन सुनारले चलाएको उक्त गाडीमा चालकसहित ६ जना सवार थिए। दुर्घटनामा उनीहरूमध्ये तीन जना घाइते भएका छन्।
घाइतेहरूलाई उपचारका लागि मजुवास्थित शुभसारथी मेडिकलमा लगिएको छ। दुर्घटनापछि पिकअप गाडी घटनास्थलमै रहेको जनाइएको छ।