बिजुलीको पोलमा काम गर्दा करेन्ट लागेर मृत्यु भएका उपेशको शव बुझ्यो परिवारले

५ जेठ काठमाडौँ / काभ्रेको धुलिखेलमा बिजुलीको खम्बामामा काम गर्दागर्दै करेन्ट लागेर मृत्यु भएका २८ वर्षीय उपेश परियारको शव परिवारले बुझेको छ ।

शनिवार काभ्रे वितरण केन्द्रबाट विस्तारित धुलिखेल नगरपालिका–७ स्थित जिल्ला प्रशासन कार्यालय अगाडिको बिजुलीको खम्बामा करेन्ट लागेर परियारको मृत्यु भएको थियो ।

उनी सर्लाहीको ईश्वरपुर नपा–१२ घारीबथाका हुन् । विद्युत प्राधिकरण, उपेशको परिवार र उनलाई काम लगाउने ठेकदारबीच सहमति जुटेपछि परिवारले शव बुझेको जिल्ला प्रहरी कार्यालय काभ्रेका डिएसपी मीनबहादुर घलले जानकारी दिए ।

उहाँहरूले आपसी सहमति गरेपछि कानुनी प्रक्रिया पूरा गरेर शव बुझ्ने काम भएको छ, उनले भने, बाँकी अनुसन्धान भइरहेको छ । अहिले शव बुझ्ने काम भएको हो । यस घटनामा सम्बन्धित निकायको लापरबाही देखिएमा कानुनी कारबाही हुने उनले बताए ।

विद्युत वितरण केन्द्र काभ्रेका साहायक प्रशासनिक अधिकृत कैलाश आचार्यका अनुसार मृतकका परिवारलाई ठेकदारले १० लाख दिने र प्राधिकरणले पनि नियमअनुसारको क्षतिपूर्ति दिने सहमति भएको छ ।

प्राधिकरणको नियम अनुसार काम गर्दैगर्दा कसैको मृत्यु भएमा ५ लाख रूपैयाँ क्षतिपूर्ति दिने प्रावधान छ । सोही अनुसार सम्झौता भएको छ ।