कक्षा १२ को वार्षिक परीक्षाका विषयमा नयाँ निर्णय भएको छैन परिक्षा हुने

८ वैशाख काठमाडौं / राष्ट्रिय परीक्षा बोर्डले कक्षा १२ को वार्षिक परीक्षा पूर्वनिर्धारित तालिकाअनुसार नै हुने जनाएको छ । पूर्वनिर्धारित तालिकाअनुसार १२ कक्षाको वार्षिक परीक्षा यही वैशाख ११ गतेबाट सञ्चालन हुनेछ ।

“कक्षा १२ को परीक्षाको सम्बन्धमा नयाँ निर्णय भएको छैन । पूर्वतालिकाअनुसार नै हुन्छ,” राष्ट्रिय परीक्षा बोर्डका सूचना अधिकारी नारायण पोख्रेलले भने, “नयाँ निर्णय भयो र परीक्षा सरेको खण्डमा हामी हाम्रो आधिकारिक वेबसाइटमा सूचना प्रकाशित गर्छौँ ।”

सरकारी विद्यालयका शिक्षकहरू आन्दोलनका क्रममा काठमाडौं छन् । त्यही कारण कक्षा १२ को परीक्षाका विषयमा अनेक अड्कलबाजी हुँदै आएका छन् । परीक्षा स्थगन गरिएको भन्ने भ्रम फैलाएपछि यही वैशाख ५ गते राष्ट्रिय परीक्षा बोर्डले कक्षा १२ को परीक्षा नसरेको जनाएको थियो ।