पोखरा सहकारीले बचत फिर्ता गर्ने प्रमाण लिएर आउन आग्रह

पुस ९, पोखरा /  पोखरा सहकारीले बचत फिर्ता गर्ने भएको छ । पुस १३ गतेदेखि १ लाखभन्दा कम बचत फिर्ता गरिने भन्दै प्रमाण लिएर कार्यालयमा आउन सञ्चालक समितिले आग्रह गरेको छ । पहिलो चरणमा १ लाखभन्दा साना बचत भएका बचतकर्ताको रकम फिर्ता गर्ने तयारी थालिएको हो ।

केही समयअघि सोही सहकारीको रकम हिनामिना गरेको आरोपमा संस्थाका अध्यक्षसहित सञ्चालक समितिका ८ जना पक्राउ परेका थिए । प्रहरी हिरासतमा रहेका उनीहरूले बचतकर्ताको रकम फिर्ता गर्ने ग्यारेन्टी र प्रतिबद्धता जनाएपछि हिरासत मुक्त भएका हुन् । हिरासतबाट छुट्नासाथ सञ्चालक समितिले बचतकर्ताको रकम फिर्ताको सूचना निकालेको हो ।

सहकारीको झण्डै ८९ करोड हिनामिना भएको वित्तीय विश्लेषण प्रतिवेदनमा उल्लेख थियो । सोही प्रतिवेदनका आधारमा सहकारी रजिष्ट्रार कार्यालयले जिल्ला प्रहरी कार्यालयलाई छानबिन र अनुसन्धानका लागि पत्र पठाएको हो ।