हुम्लामा सडक पुगेकोमा प्रधानमन्त्री खुशी,फेसबुकमा लेख्नुभयो : दशकौं पुरानो सपना पुरा हुँदैछ

१३ असार काठमाडौं / राष्ट्रिय राजमार्गसँग जोडिन बाँकी रहेको एकमात्र जिल्ला हुम्लामा सडक पुगेकोमा प्रधानमन्त्री केपी शर्मा ओलीले खुशी व्यक्त गर्नुभएको छ ।
प्रधानमन्त्री ओलीले सामाजिक सञ्जालमा लेख्दै हुम्लामा सडक पुर्याउने दशकौं पुरानो सपना पुरा हुन लागेकोमा खुशीयाली व्यक्त गर्नुभएको हो । प्रधानमन्त्री ओलीले हुम्लामा सडक पुगेपछि हिल्सा नाकाबाट नेपाल चीनसँग जोडिने उल्लेख गर्नुभएको छ । हुम्लाको खार्पुनाथमा पुल निर्माण अन्तिम चरणमा पुगेको छ । उक्त पुल प्रधानमन्त्री ओलीले उद्घाटन गर्ने तयारी भए पनि मौसमका कारण केही पछि सरेको छ ।

हुम्ला सडक सञ्जालसँग जोडिएको अवशरमा प्रधानमन्त्रीले लेख्नुभएको छ ‘हालसम्म राष्ट्रिय सडक सञ्जालमा जोडिन बाँकी रहेको जिल्ला हुम्लाको सदरमुकाम सिमकोट अब केही दिनमै राष्ट्रिय सडक सञ्जालमा जोडिने भएको छ । हुम्लामा सडक सञ्जाल पुर्याउने हाम्रो दशकौं पुरानो सपना पुरा हुँदै छ । यो सडक चलेपछि नेपाल हिल्सा नाकाबाट छिमेकी मित्रराष्ट्र चीनसँग जोडिने छ । ’