धादिङमा सडकबाट खोलामा टिपर खस्दा २ जना घाइते

१३ असार / धादिङको थाक्रे गाउँपालिका–७ आठकिलोमा टिपर दुर्घटना भएको छ । गएराति साढे १२ बजे पृथ्वी लोकमार्ग सडकमा सातकिलोबाट गजुरीतर्फ जाँदै गरेको प्र ३–०१–०५ ख ९३६३ नम्बरको टिपर अनियन्त्रित भएर सडकबाट १० मिटर तल खसेको धादिङ प्रहरीले जनाएको छ ।

दुर्घटनामा टिपर चालक मकवानपुरको इन्द्रसरोवर गाउँपालिका–१ मार्खु बस्ने ४८ वर्षीय मानकाजी बल र सोही टिपरमा सवार १८ वर्षीय निशान ठकुरी घाइते भएको जिल्ला प्रहरी कार्यालय धादिङका सूचना अधिकारी डिएसपी सुवास हमालले जानकारी दिए । दुवै घाइतेलाई उपचारका लागि काठमाडौंको ट्रमा सेन्टर ल्याइएको छ ।