Post views: 24
१७ कात्तिक, काठमाडौं । पूर्वप्रधानमन्त्री तथा नेपाल कम्युनिस्ट पार्टी (नेकपा)का नेता माधवकुमार नेपालविरुद्ध विशेष अदालतमा अर्को भ्रष्टाचार मुद्दा पेस भएको छ ।
मन्त्रिपरिषद्बाट निर्णय गराएर सार्वजनिक जग्गा छुट दर्ता गराएको आरोपमा अख्तियार दुरुपयोग अनुसन्धान आयोगले नेपालविरुद्ध मुद्दा पेस गरेको हो ।
अख्तियारले विराटनगर क्षेत्रको सार्वजनिक जग्गा छुट दर्ता गर्ने क्रममा अनियमितता भएको दाबी गरेको छ । सोही प्रकरणमा नेपालविरुद्ध भ्रष्टाचार मुद्दा विशेष अदालतमा पेस गरिएको हो ।
हाल उक्त मुद्दा विशेष अदालतमा रुजु हुने क्रममा रहेको छ ।
यसअघि पनि नेपालविरुद्ध पतञ्जली जग्गा प्रकरणमा विशेष अदालतमा भ्रष्टाचार मुद्दा दायर भएको थियो । उक्त मुद्दा अहिले पनि विशेष अदालतमा विचाराधीन रहेको छ ।
नेपालविरुद्ध सार्वजनिक जग्गा छुट दर्तासम्बन्धी अर्को भ्रष्टाचार मुद्दा पेस भएपछि उनीविरुद्ध विशेष अदालतमा विचाराधीन मुद्दाको संख्या थपिएको छ ।
