Post views: 48
१७ कात्तिक, सुर्खेत । डोल्पा जिल्ला कारागारबाट सुरुङ खनेर फरार भएका ८ जना कैदीबन्दीमध्ये दुई जनालाई प्रहरीले पुनः पक्राउ गरेको छ ।
शुक्रबार राति कारागारबाट भागेका उनीहरूलाई चेकजाँचका क्रममा प्रहरीले नियन्त्रणमा लिएको हो ।
प्रदेश प्रहरी कार्यालयका प्रवक्ता एसएसपी सन्तोषसिंह राठौरका अनुसार पक्राउ पर्नेमा जबर्जस्ती करणी मुद्दाका कैदी रुकुम पश्चिमको आठबिसकोट नगरपालिका–१० का ३२ वर्षीय रामबहादुर विक र सल्यानको कुमाख गाउँपालिका–५ का २८ वर्षीय रेशम राना रहेका छन् ।
राठौरका अनुसार चेकजाँचका क्रममा दुई जना भाग्न खोजेपछि प्रहरीले नियन्त्रणमा लिएर सोधपुछ गरेको थियो । सोधपुछका क्रममा उनीहरू डोल्पा कारागारबाट फरार भएका कैदी रहेको खुलेको उनले बताए ।
पहिचान खुलेपछि उनीहरूलाई नियन्त्रणमा लिएर प्रहरी चौकी गोतामकोटमा राखिएको छ ।
कैदीबन्दीको खोजीका लागि चौरजहारी बेस क्याम्प रुकुम पश्चिम तथा प्रहरी चौकी गोतामकोटबाट प्रहरी सहायक निरीक्षक बुद्धिराम वलीको कमान्डमा पाँच जनाको प्रहरी टोली परिचालन गरिएको थियो ।
कारागारबाट फरार भएका बाँकी ६ जना कैदीबन्दीको खोजीकार्य जारी रहेको प्रहरीले जनाएको छ ।
