बाख्रा चराउन गएकी वृद्धाको पहिरोमा परेर मृत्यु

१५ भदौ रूकुम / रूकुम पश्चिममा बाख्रा चराउन गएकी एक वृद्धाको सुख्खा पहिरोमा परेर मृत्यु भएको छ । जिल्लाको मुसीकोट नगरपालिका वडा नम्बर १ तलिगाउँमा सुख्खा पहिरोले पुर्दा ६९ वर्षीया हिमकुमारी मल्लको मृत्यु भएको हो ।

जिल्ला प्रहरी प्रवक्ता प्रहरी निरीक्षक हरिप्रसाद पुनका अनुसार बाख्रा चराउन गएकी उनको माथिबाट झरेको सुख्खा पहिरोमा परी मृत्यु भएको हो ।
आइतबार दिउँसो साढे १२ बजेतिर मल्ललाई पहिरोले पुरेको र केही बेरअघि मात्रै शव निकालिएको प्रहरी निरीक्षक पुनले बताए ।

शव पोष्टमर्टमका लागि अस्पतालतर्फ लैजाने तयारी गरिएको छ । पहिरोमा परी एउटा बाख्रा र एउटा भेडा पनि मरेका छन् ।