
२ मंसिर, जनकपुरधाम । वीरगञ्जस्थित नेशनल मेडिकल कलेजमा उपचारका क्रममा १८ दिनको नवजात शिशुको मृत्यु भएपछि अस्पताल परिसर तनावग्रस्त बनेको छ ।
बाराको कलैया उपमहानगरपालिका–२२ निवासी सन्दीप साहका १८ दिनका छोराको मंगलबार दिउँसो उपचारका क्रममा मृत्यु भएको हो । शिशुको मृत्यु भएपछि आफन्त र स्थानीयले अस्पतालका चिकित्सकमाथि उपचारमा लापरबाही गरेको आरोप लगाउँदै प्रदर्शन गरेका छन् ।
शिशुलाई जण्डिस भएपछि गत शनिबार अस्पताल भर्ना गरिएको थियो । उपचारका क्रममा शिशुको मृत्यु भएपछि परिवारले घटनाको वास्तविक कारण सार्वजनिक गर्न माग गर्दै अस्पतालसँग सीसीटीभी फुटेज उपलब्ध गराउन माग गरेका छन् । उनीहरूको प्रदर्शन बुधबार पनि जारी छ ।
मृतक शिशुका हजुरबुबा पर्ने नरेश साहले स्वास्थ्यमा सुधार आएको र डिस्चार्ज गर्ने भनिएको अवस्थामा स्टाफ नर्सले सुई लगाएपछि पाँच मिनेटमै शिशुको मृत्यु भएको दाबी गरेका छन् ।
‘उपचारमा लापरबाहीकै कारण बच्चाको मृत्यु भएको छ । अस्पतालले सीसीटीभी फुटेज उपलब्ध गराओस् । घटनाको निष्पक्ष छानबिन होस्,’ उनले भने ।
त्यस्तै, शिशुकी आमा नमिता साहले पनि चिकित्सकको लापरबाहीका कारण आफूले सन्तान गुमाउनुपरेको आरोप लगाएकी छन् ।
चार वर्षसम्म सन्तानको प्रतीक्षा गरेपछि पहिलो सन्तानका रूपमा जन्मिएको शिशुको मृत्यु भएपछि नमिता शोकमा डुबेकी छन् । उनले घटनाको निष्पक्ष छानबिन गरी दोषीमाथि कारबाही गर्न माग गरेकी छन् ।
घटनापछि मृतक परिवारले अहिलेसम्म शिशुको शव बुझेका छैनन् । परिवारले उपचारमा संलग्न चिकित्सक तथा स्वास्थ्यकर्मीको भूमिकाबारे छानबिन र घटनाको सत्यतथ्य सार्वजनिक गर्न माग गरिरहेको छ ।