२०८३ मंसिर ४, बिहिबार

गृहमन्त्रीमार्फत मन्त्रिपरिषद्मा निवेदन, पुरानै निर्णय सदर भए अदालत जाने बाटो खुल्ने

बर्खास्तीविरुद्ध एआईजी वंशीराज दाहालको पुनरावेदन, मन्त्रिपरिषद्बाट निर्णय हुने

बर्खास्तीविरुद्ध एआईजी वंशीराज दाहालको पुनरावेदन
बर्खास्तीविरुद्ध एआईजी वंशीराज दाहालको पुनरावेदन, मन्त्रिपरिषद्बाट निर्णय हुने

३ मंसिर, काठमाडौं । बर्खास्तीमा परेका सशस्त्र प्रहरी बलका अतिरिक्त महानिरीक्षक (एआईजी) वंशीराज दाहालले सरकारी निर्णयविरुद्ध पुनरावेदन दिएका छन् ।

स्रोतका अनुसार दाहालले गृहमन्त्रीमार्फत प्रधानमन्त्री तथा मन्त्रिपरिषद्को कार्यालयमा बर्खास्तीको निर्णय बदर गर्न माग गर्दै पुनरावेदन निवेदन दिएका हुन् ।

उनको निवेदनमाथि निर्णय गर्ने अधिकार मन्त्रिपरिषद्मा रहेको छ । मन्त्रिपरिषद्ले यसअघिकै निर्णय सदर गरेमा दाहाललाई अदालत जाने बाटो खुल्नेछ । अहिलेको कानुनी प्रक्रियाअनुसार सोझै अदालत जान नमिल्ने भएकाले उनले पहिले मन्त्रिपरिषद्मा पुनरावेदन दिएको स्रोतले जनाएको छ ।

संवेदनशील तथा गम्भीर सूचना चुहाएको आरोपमा सरकारले गत २३ असोजमा दाहाललाई बर्खास्त गरेको थियो । बिचौलियाका रूपमा चिनिएका इनम सापकोटासँग सम्बन्ध देखिएको र प्रधानमन्त्रीसँग सम्बन्धित सूचना चुहाएको आरोप उनीमाथि लागेको थियो ।

इनम पक्राउ परेपछि उनको मोबाइल फोनबाट एआईजी दाहालसँगको सम्पर्क देखिएको थियो । इनमसँगको सम्बन्ध र उनलाई संवेदनशील सूचना चुहाएको आरोपमा सरकारले गत १९ असोजमा दाहाललाई निलम्बन गरेको थियो ।

त्यसपछि सरकारले एआईजी अञ्जनीकुमार पोखरेललाई घटनाको छानबिन गर्ने जिम्मेवारी दिएको थियो । छानबिनपछि प्रहरी कर्मचारीले पालना गर्नुपर्ने पदीय आचरणविपरीत काम गरेको भन्दै सरकारले २३ असोजमा दाहाललाई बर्खास्त गरेको थियो ।

यस प्रकरणमा पूर्वप्रधानन्यायाधीश चोलेन्द्रशमशेर जबराको पक्राउसँग जोडिएको विषय पनि सार्वजनिक भएको थियो ।

काठमाडौं उपत्यका अपराध अनुसन्धान कार्यालयको टोलीले गत ११ असोजमा जबरालाई उनकै निवासबाट पक्राउ गरेको थियो । उनलाई राति २ बजे पक्राउ गरी करिब १२ घण्टासम्म प्रहरी नियन्त्रणमा राखेर सोधपुछ गरिएको थियो ।

जबरालाई पक्राउ गरेलगत्तै एआईजी दाहाल प्रहरी हिरासतमा पुगेर भेटेको विषयसमेत सार्वजनिक भएको थियो । यही प्रकरणसँग जोडिएका विषयलाई लिएर दाहालमाथि अनुसन्धान अघि बढाइएको थियो ।

यो पनि

ताजा अपडेट

यो साताको प्रचलित

खोजी गर्नुहोस