ब्रेक फेल भएर २० मिटर तल खस्यो आलु बोकेको बोलेरो, चालकको मृत्यु

१५ असोज, बझाङ । बझाङको सुर्मा गाउँपालिका–२ मन्दोगडीमा बोलेरो जिप दुर्घटना हुँदा चालकको घटनास्थलमै मृत्यु भएको छ भने दुईजना घाइते भएका छन् ।

प्रहरीका अनुसार सदरमुकाम चैनपुरतर्फ आउँदै गरेको कर्णाली प्रदेश ००१ च १०९५ नम्बरको बोलेरो जिप अचानक ब्रेक फेल भएपछि सडकबाट करिब २० मिटर तल खसेको हो ।

दुर्घटनामा सुर्मा गाउँपालिका–४ का २६ वर्षीय चालक कुन्दन बोहराको घटनास्थलमै मृत्यु भएको प्रहरीले जनाएको छ ।

प्रारम्भिक जानकारीअनुसार उक्त बोलेरो जिप सुर्मा गाउँपालिका–४ का स्थानीय किसानले उत्पादन गरेको आलु बिक्रीका लागि सदरमुकाम चैनपुरतर्फ ल्याउँदै थियो । जिपमा चालकसहित तीनजना सवार थिए ।

दुर्घटनामा जिपमा सवार अन्य दुईजना सामान्य घाइते भएका छन् । उनीहरूलाई उपचारका लागि जिल्ला अस्पताल सिमखेत, बझाङ लगिएको प्रहरीले जनाएको छ ।

दुर्घटनाबारे थप अनुसन्धान भइरहेको प्रहरीले जनाएको छ ।