सिराहामा हवाई फायरिङ गरेर ३०० ग्राम खैरो हेरोइनसहित दुई भारतीय नागरिक पक्राउ

सिराहा । सिराहामा प्रहरीले एक राउन्ड हवाई फायरिङ गर्दै ३०० ग्राम खैरो हेरोइनसहित दुई भारतीय नागरिकलाई पक्राउ गरेको छ।
लागुऔषधको अवैध कारोबार भइरहेको विशेष सूचनाका आधारमा परिचालित लागुऔषध नियन्त्रण ब्युरोको टोलीले उनीहरूलाई पक्राउ गरेको हो।
इन्स्पेक्टर राकेश यादवको नेतृत्वमा खटिएको प्रहरी टोलीले लागुऔषध नियन्त्रण गर्ने क्रममा सुरक्षा सतर्कता अपनाउँदै एक राउन्ड हवाई फायरिङ गरेको जनाएको छ। त्यसपछि प्रहरीले ३०० ग्राम खैरो हेरोइनसहित दुई भारतीय नागरिकलाई नियन्त्रणमा लिएको हो।
पक्राउ परेका व्यक्तिहरूमाथि थप अनुसन्धान भइरहेको प्रहरीले जनाएको छ। उनीहरू लागुऔषध कारोबारमा कसरी संलग्न थिए र यसमा अन्य व्यक्तिहरूको समेत संलग्नता छ वा छैन भन्ने विषयमा अनुसन्धान भइरहेको छ।