न्यायाधीश हरि फुयाल तिहार बिदापछि मात्रै अदालत फर्किने

१७ कात्तिक, काठमाडौं । सर्वोच्च अदालतका न्यायाधीश हरि फुयाल तिहार बिदापछि मात्रै अदालत फर्किने भएका छन् । उनले मंगलबारदेखि शुक्रबारसम्मका लागि बिदा लिएका हुन् ।

सर्वोच्च अदालत प्रशासनका अनुसार न्यायाधीश फुयालले चार दिनको बिदा लिएका छन् । शुक्रबारपछि तिहार बिदा सुरु हुने भएकाले उनी अब आगामी ३० कात्तिकमा मात्रै अदालत हाजिर हुनेछन् ।

उच्चपदस्थ अधिकारीहरूसँग सेटिङको प्रयास गरेको आरोपमा पक्राउ परेका इनम सापकोटासँग होटल हिमालयमा भेटेको विवरण सार्वजनिक भएपछि न्यायाधीश फुयालमाथि प्रश्न उठेको थियो ।

उक्त विवरण सार्वजनिक भएपछि फुयालले सापकोटासँगको भेटका कारण आफूले हेरिरहेको विचाराधीन मुद्दामा कुनै प्रभाव नपरेको भन्दै स्पष्टीकरण दिएका थिए ।

सापकोटासँगको भेटको विषय सार्वजनिक भएपछि विवादमा तानिएका न्यायाधीश फुयाल तिहार बिदापछि मात्रै सर्वोच्च अदालत फर्किने भएका हुन् ।