कांग्रेस धुनिवेशी नगर अधिवेशनमा युवा क्लस्टरबाट मनिष उप्रेतीको उम्मेदवारी

११ असोज, धुनिवेशी । नेपाली कांग्रेसको १५औँ महाधिवेशनअन्तर्गत धादिङको धुनिवेशी नगर अधिवेशनमा मनिष उप्रेतीले युवा क्लस्टरबाट महाधिवेशन प्रतिनिधिका लागि उम्मेदवारी दिएका छन् ।
सामाजिक व्यक्तित्वका रूपमा परिचित तेजप्रसाद उप्रेतीका नाति मनिष राजनीतिक परिवारमा हुर्किएका हुन् । कांग्रेसको १४औँ महाधिवेशनमा समेत महाधिवेशन प्रतिनिधिका लागि उम्मेदवारी दिएका उप्रेती कम मतले पराजित भएका थिए । यसपटक भने प्रतिनिधिहरूले आफूलाई न्याय गर्ने विश्वास रहेको उनले बताएका छन् ।
नेपाली कांग्रेस धुनिवेशी नगर अधिवेशनको उद्घाटन असोज ९ गते भएको थियो । नगर सभापति र सचिव पदमा सर्वसम्मत हुन नसकेपछि निर्वाचन प्रक्रिया अघि बढाइएको हो ।
निर्वाचन समितिले आज असोज ११ गते बिहान ११ बजे निर्वाचनको मिति घोषणा गरेको थियो । सोही निर्वाचन प्रक्रियाअन्तर्गत उप्रेतीले युवा क्लस्टरबाट महाधिवेशन प्रतिनिधिका रूपमा आफ्नो उम्मेदवारी प्रस्तुत गरेका हुन् ।
युवा पुस्ताको कांग्रेस राजनीतिमा सक्रिय सहभागिता आवश्यक रहेको बताउँदै उप्रेतीले पार्टी संगठनलाई थप सुदृढ बनाउन आफ्नो भूमिका रहने बताएका छन् ।