पत्रकार धरपकडको छानबिन गर्न संसदीय विशेष समिति बनाउन कांग्रेसको माग

१७ कात्तिक, काठमाडौं । प्रमुख प्रतिपक्षी दल नेपाली कांग्रेसले सरकार स्वेच्छाचारी बन्दै गएको आरोप लगाउँदै पत्रकार धरपकडलगायतका घटनाको छानबिन गर्न संसदीय विशेष समिति गठन गर्न माग गरेको छ ।

सोमबार बिहान सिंहदरबारमा बसेको कांग्रेस संसदीय दलको बैठकले पत्रकार पक्राउ तथा सरकारसँग जोडिएका विवादित गतिविधिको निष्पक्ष छानबिनका लागि संसदीय विशेष समिति गठन गर्न माग गर्ने निर्णय गरेको हो ।

बैठकपछि संसदीय दलका नेता भीष्मराज आङदेम्बेले निर्वाचनबाट प्राप्त जनमत संविधान र कानुनभन्दा माथि हुन नसक्ने बताए ।

पछिल्ला सरकारी गतिविधिले नागरिक स्वतन्त्रता, प्रेस स्वतन्त्रता, संवैधानिक संस्थाको स्वायत्तता र विधिको शासनमाथि गम्भीर प्रश्न खडा गरेको कांग्रेसको ठहर रहेको उनले जानकारी गराए ।

कांग्रेसले पक्राउको स्पष्ट कानुनी आधार, पुर्जी वा अदालतको अनुमतिविना समाचार कक्षमै प्रहरी परिचालन गरी पत्रकारलाई पक्राउ गरिएको घटनाप्रति आपत्ति जनाएको छ ।

‘पक्राउको स्पष्ट कानुनी आधार र अदालतको अनुमतिविना समाचार कक्षमै प्रहरी परिचालन गरिनु स्वतन्त्र पत्रकारितामाथि अनुचित दबाब मात्र होइन, विधिको शासनविपरीतको स्वेच्छाचारिता हो,’ बैठकको निर्णय सुनाउँदै नेता आङदेम्बेले भने, ‘यसको जवाफ सरकारले संसद् र जनतालाई दिनुपर्छ।’

उनले सरकारले कानुनी प्रक्रिया पालना नगरी ‘जे गरे पनि हुन्छ, जवाफ दिनु पर्दैन’ भन्ने प्रवृत्ति देखाएको टिप्पणी गरे ।

यस्ता गतिविधिले मुलुकको संवैधानिक संरचनालाई कमजोर बनाएर आफूअनुकूलको शासन लाद्ने खतरा रहेको कांग्रेसको निष्कर्ष रहेको उनले बताए ।

कांग्रेसले पत्रकार धरपकड तथा सरकारसँग जोडिएका सबै विवादित गतिविधिको स्वतन्त्र, निष्पक्ष र पारदर्शी छानबिन गर्न संसदीय विशेष समिति गठन गर्नुपर्ने माग गरेको छ । साथै, घटनामा दोषी देखिएकालाई कानुनबमोजिम कारबाहीको दायरामा ल्याउन पनि माग गरेको छ ।

सरकारका राम्रा काम, जनसरोकारका विषय र सुशासनका पक्षमा कांग्रेसको समर्थन रहने भए पनि विधिको शासन, प्रेस स्वतन्त्रता र शक्ति पृथकीकरणको सिद्धान्तविपरीत सरकार अघि बढे कडा प्रतिरोध गर्ने चेतावनी नेता आङदेम्बेले दिएका छन् ।