
१ मंसिर, काठमाडौं । भाटभटेनी सुपरस्टोरको काठमाडौंस्थित टंगाल शाखा आजदेखि चौबिसै घण्टा सञ्चालनमा आएको छ ।
ग्राहकले रातिको समयमा समेत आफ्नो अनुकूलताअनुसार किनमेल गर्न सकून् भन्ने उद्देश्यले टंगाल शाखालाई २४ सै घण्टा खुला गरिएको भाटभटेनीका प्रमुख सञ्चालन अधिकृत (सीओओ) पानु पौडेलले जानकारी दिए ।
यसअघि भक्तपुरको राधेराधे शाखाबाट भाटभटेनीले चौबिसै घण्टे सेवा सुरु गरेको थियो । अब टंगाल शाखाबाट पनि ग्राहकले जुनसुकै समयमा किनमेल गर्न सक्नेछन् ।
व्यवसायी मीनबहादुर गुरुङले ४२ वर्षअघि काठमाडौंको टंगालबाट सुरु गरेको भाटभटेनी सुपरस्टोरको हाल देशभर २७ वटा शाखा सञ्चालनमा छन् । कम्पनीले वार्षिक करिब ३२ अर्ब रुपैयाँ आम्दानी गर्दै आएको छ भने देशभरका स्टोरमा २२ हजारभन्दा बढीले प्रत्यक्ष रोजगारी पाएका छन् ।
२०८२ साल भदौ २३ र २४ गते भएको जेनजी आन्दोलनका क्रममा भाटभटेनीका १२ वटा स्टोरमा आगजनी, लुटपाट र तोडफोड भएको थियो । उक्त घटनाबाट कम्पनीलाई अर्बौं रुपैयाँ बराबरको क्षति पुगेको थियो ।
ठूलो क्षति व्यहोर्नुपरे पनि कम्पनीले कुनै पनि कर्मचारीको रोजगारी नगुमाई पुनः लगानी गरेर अधिकांश स्टोर सञ्चालनमा ल्याएको जनाएको छ ।
जेनजी आन्दोलनका क्रममा पूर्णरूपमा क्षतिग्रस्त भएको टंगालस्थित भाटभटेनी पनि मर्मत तथा पुनर्निर्माणपछि गत असोज ५ गतेदेखि पुनः सञ्चालनमा आएको थियो ।
पुनः सञ्चालनमा आएको उक्त शाखालाई आजदेखि चौबिसै घण्टा खुला गरिएसँगै ग्राहकले अब दिन वा रात जुनसुकै समयमा पनि किनमेल गर्न सक्नेछन् ।