
४ मंसिर, काठमाडौं । नेपाल प्रिमियर लिग (एनपीएल) को तेस्रो संस्करणको फाइनल खेलको टिकट बिक्री सुरु नहुँदै ‘सोल्ड आउट’ देखिएपछि दर्शकले असन्तुष्टि जनाएका छन् ।
शुक्रबार दिउँसो १ बजे टिकट बिक्री खुल्ने भनिएको थियो । तर, बिक्री सुरु हुनुअघि नै टिकटिङ प्लेटफर्ममा फाइनलको टिकट ‘सोल्ड आउट’ देखिएको हो ।
दिउँसो १२ बजेर ५७ मिनेटमा टिकटिङ प्लेटफर्म खोल्दा फाइनलको टिकट सोल्ड आउट देखिएको थियो । केही प्रयोगकर्ताको स्क्रिनमा भने टिकट बिक्री खुल्ने समय दिउँसो १ बजे नै देखिइरहेको थियो ।
तर, बिक्री खुल्ने निर्धारित समय भएपछि टिकट काट्न प्रयास गर्दा पनि सफल नभएको दर्शकले बताएका छन् । धेरै प्रयोगकर्ताले दिउँसो १ बजेर १ मिनेटमा टिकट खरिद गर्न खोज्दा समेत टिकट काट्न नसकेको गुनासो गरेका छन् ।
टिकट बिक्री सुरु नहुँदै सोल्ड आउट देखिनु र बिक्री खुल्ने समय देखिएका प्रयोगकर्ताले समेत टिकट खरिद गर्न नपाएपछि सामाजिक सञ्जालमा असन्तुष्टि बढेको छ ।
यसअघि पनि एनपीएलका खेलको टिकट बिक्री खुल्ने समयमा प्राविधिक समस्या देखिने तथा केही समयमै टिकट सोल्ड आउट हुने गरेको भन्दै दर्शकले गुनासो गर्दै आएका थिए ।
फाइनल खेलको टिकट बिक्रीमा समेत उस्तै समस्या देखिएपछि टिकट व्यवस्थापनमाथि प्रश्न उठेको छ ।