Post views: 3
धादिङ । त्रिशूली नदीमा आएको बाढी र कटानका कारण धादिङको कृष्णभिर क्षेत्रले करिब २० वर्षअघिको स्वरूप देखाउन थालेको छ। नदीको तीव्र कटानले सडक क्षेत्रमा क्षति पुगेपछि यातायात सञ्चालनमा समस्या भएको हो।
क्षतिग्रस्त सडकलाई तत्काल सञ्चालनमा ल्याउन सडक विभाग तथा सम्बन्धित निकायले कामलाई तीव्रता दिएका छन्। भदौ मसान्तभित्र सडक खोल्ने लक्ष्यसहित १० वटा मेसिन र ३० जना जनशक्ति परिचालन गरिएको जनाइएको छ।
कटानका कारण सडकको केही भाग जोखिममा परेपछि सवारी आवागमन प्रभावित भएको छ। सडक सञ्चालनका लागि आवश्यक स्थानमा कटान नियन्त्रण, माटो तथा ढुंगा हटाउने र सडक सम्याउने काम भइरहेको छ।
सम्बन्धित निकायले मौसमले साथ दिएमा तोकिएको समयभित्रै सडक सञ्चालनमा ल्याउने लक्ष्य राखेको जनाएको छ। सडक पुनः सञ्चालनमा आएपछि धादिङ हुँदै काठमाडौँ तथा अन्य जिल्लातर्फ आवतजावत गर्ने यात्रुलाई सहज हुने अपेक्षा गरिएको छ।
त्रिशूली नदीको कटानका कारण कृष्णभिर क्षेत्रमा देखिएको जोखिमलाई मध्यनजर गर्दै सडक सुरक्षाका लागि थप आवश्यक व्यवस्थापनसमेत गरिने बताइएको छ।
